कर्णाली प्रदेशमा जनस्वास्थ्यको क्षेत्रलाई बलियो बनाउनका लागि अमेरिका र नेपालद्वारा साझेदारी

२०७६ असोज ९

 

कर्णाली प्रदेश – अमेरिकी अन्तर्राष्ट्रिय विकास नियोग (युएसएआईडी) र नेपाल सरकारको अर्थ मन्त्रालयबिच हस्ताक्षर भएको द्विपक्षीय सहमतिबमोजिम आज नेपालस्थित युएसएआईडी कार्यालय र कर्णाली प्रदेशको सामाजिक विकास मन्त्रालयका बिच उक्त प्रदेशमा गुणस्तरीय स्वास्थ्य सेवामा पहुँच वृद्धिका लागि एक साझेदारी सुरु भएको छ । नेपालको नयाँ संघीय संरचनामा नेपाल सरकारको स्वीकृत बजेटअन्तर्गत प्रदेशमा सिधै सहयोग प्रदान सुरु गर्ने युएसएआईडी पहिलो विकास साझेदार बनेको छ । अन्य प्रदेशहरूको तुलनामा कर्णाली प्रदेशमा पाँच वर्षमुनिका बालबालिकाको मृत्यु दर दोस्रो उच्च रहेको छ (प्रति १,००० जन्ममा ५८) भने कुल प्रजन दर समेत दोस्रो उच्च नै रहेको छ (प्रति महिला २.८ बालबालिका) । यस साझेदारीमार्फत युएसएआईडीले कर्णाली प्रदेशलाई मातृस्वास्थ्यका साथै नवजात शिशु र बालबालिकाको स्वास्थ्य सेवामा सुधारमार्फत जीवन रक्षाका निम्ति छ करोड ६० लाख रुपैयाँसम्मको लगानी गर्न सहयोग गर्नेछ ।

स्वास्थ्यसम्बन्धी यी कार्यक्रमहरूलाई स्वास्थ्य तथा जनसङ्ख्या मन्त्रालयसँगको साझेदारीमा कर्णाली प्रदेशको सामाजिक विकास मन्त्रालयले कार्यान्वयन गर्नेछ र यसमा स्वास्थ्य तथा जनसङ्ख्या मन्त्रालयको रातोकिताबमा युएसएआईडीबाट योगदान भएको आर्थिक सहयोग सदुपयोग गरिनेछ । कर्णाली प्रदेशका माननीय सामाजिक विकास मन्त्री श्री दल रावल, सामाजिक विकास सचिव डा. मानबहादुर विश्‍वकर्मा र युएसएआईडी नेपालका कार्यवाहक निर्देशक एड्रिआना हेजको उपस्थिति रहेको एक औपचारिक कार्यक्रमका बिच उक्त साझेदारीको संयुक्त रूपमा घोषणा गरिएको थियो ।

###