नोटरी सेवा

नेपालमा नोटरी सेवा पर्याप्त मात्रामा उपलब्ध छ । दूतावासले कुनै निश्‍चित नोटरी सेवाप्रदायकको सिफारिस गर्दैन । नेपालमा उपलब्ध नोटरी सेवाका लागि नेपाल नोटरी पब्लिक परिषद्को वेबसाइट हेर्नुहोला :  http://www.notarypublic.org.np/

अमेरिकी वा गैरअमेरिकी नागरिकका लागि नोटरी सेवा प्रायः आवश्यक परिरहन्छ । अमेरिकी वा गैरअमेरिकी नागरिकका लागि विभिन्न प्रकारका नोटरी सेवाहरू दूतावासले पनि उपलब्ध गराउँछ । यो सेवाका लागि सोमबार, बिहीबार र शुक्रबार दिउँसो १ देखि ३ बजेसम्मको समय निर्धारित गरिएको छ । नोटरी सेवाका लागि अनलाइन अपोइन्टमेन्ट लिनु आवश्यक छ : https://evisaforms.state.gov/acs/default.asp?postcode=KDU&appcode=1

नोटरी सेवा लिँदा कन्सुलरले गर्ने प्रत्येक हस्ताक्षरका लागि ५० अमेरिकी डलर तिर्नुपर्नेछ । तपाईंको कागजातका लागि तिर्नुपर्ने शुल्कको निर्धारण गर्न कन्सुलर अधिकारीलाई सोध्नुहोला । शुल्क अमेरिकी क्रेडिट कार्डमार्फत वा नगदमा (अमेरिकी डलर वा नेपाली रुपैयाँमा) तिर्न सकिनेछ ।

नोटरी सेवाका लागि पासपोर्ट वा तपाईंको फोटो र हस्ताक्षर भएको सरकारद्वारा जारी परिचयपत्र लिई आउनुहोला ।
धेरैजसो प्रयोग भैराख्‍ने फारमहरू दूतावासमा पाइन्छन् । कानुनी कागजातमा तपाईंले हस्ताक्षर गर्नुपर्नेछ भने दूतावासमा आएर मात्र गर्नुहोला ।

विवाह योग्यताको शपथपत्र (अफिडाभिट अफ एलिजिबिलिटी टु म्यारी)

नेपाली कानुनअनुसार नेपालमा विवाह गर्नका लागि विदेशी नागरिकले विवाह योग्यताको शपथपत्र पेश गर्नुपर्नेछ । यो शपथपत्र नेपाली नागरिकता नभएका अमेरिकी ग्रीनकार्ड होल्डरहरूलाई पनि उपयोगी हुन्छ । यो फारम लिनका लागि अमेरिकी दूतावासमा अनलाइन अपोइन्टमेन्ट लिनुपर्ने हुन्छ : https://evisaforms.state.gov/acs/default.asp?postcode=KDU&appcode=1 । यसका लागि दूतावासमा ५० अमेरिकी डलर शुल्क तिर्नुपर्नेछ र आफ्नो अमेरिकी पासपोर्ट वा ग्रीनकार्ड लिई आउनुपर्नेछ । यस्तो शपथपत्र विवाहको तत्काल अगाडि मात्र लिनुहुन हाम्रो सुझाव छ । शपथपत्र लिएको धेरै समयपछि विवाह दर्ता गर्न जाँदा स्थानीय अधिकारीले तपाईंसँग फेरि नयाँ शपथपत्र माग्न सक्नेछन् । पहिला विवाहित भएको भए सम्बन्धविच्छेद गरेको कानुनी प्रमाणपत्र वा पति/पत्‍नीको मृत्युको प्रमाणपत्र पेश गर्नुपर्नेछ ।

अमेरिकी ड्राइभिङ लाइसेन्स शपथपत्र

नेपाली कानुन अनुसार नेपालभित्र सवारी साधन चलाउन अमेरिका वा संसारका जुनसुकै देशका नागरिकले पनि नेपालकै ड्राइभिङ लाइसेन्स लिनुपर्छ । अमेरिकी ड्राइभिङ लाइसेन्स शपथपत्र र आफ्नो प्रादेशिक वा अन्तर्राष्ट्रिय लाइसेन्स पेश गर्नुभयो भने नेपालको यातायात व्यवस्था विभागले त्यसको आधारमा नेपाली ड्राइभिङ लाइसेन्स प्रदान गर्छ । यो फर्म दूतावासमा उपलब्ध छ र यसका लागि अनलाइन अपोइन्टमेन्ट लिनुपर्छ : https://evisaforms.state.gov/acs/default.asp?postcode=KDU&appcode=1 । अपोइन्टमेन्टका बेला ५० डलर शुल्क तिरी आफ्नो ड्राइभिङ लाइसेन्स देखाउनुहोला । नोटरी गरिएको शपथपत्र लिई आफ्नो ड्राइभिङ लाइसेन्ससमेत एकान्तकुना (ललितपुर), चावहिल (काठमाडौं), जगाती (भक्तपुर) वा स्वयम्भू ठूलो भर्‍याङ (काठमाडौं) स्थित यातायात व्यवस्था कार्यालयमा जानुहोला । त्यहाँ तपाईंको आँखाको जाँच गरिनेछ, तर अमेरिकी ड्राइभिङ लाइसेन्स भएका कारण लिखित र प्रयोगात्मक परीक्षाहरू दिनुपर्ने छैन ।

कागजातका प्रमाणित प्रतिलिपि

अमेरिकामा प्रयोगका लागि आवश्यक भएमा दूतावासले कागजातको प्रतिलिपि प्रमाणित (‘सर्टिफाइड ट्रु कपी’) गरिदिन सक्छ । ‘सर्टिफाइड ट्रु कपी’ भनेको सक्कलबमोजिम फोटोकपी मिल्छ भनी प्रमाणित गरी नोटरीको छाप लगाइएको कपी हो । यसले सक्कल कागज नै ठीक छ भन्ने चाहिँ प्रमाणित गर्दैन । उदाहरणका लागि अमेरिकी आन्तरिक राजस्व विभाग (इन्टरनल रिभिन्यू सर्भिस) मा व्यक्तिगत करदाता परिचय नम्बर (आइ.टि.आइ.एन.) लिनका लागि डब्लु–७ फर्म बुझाउँदा नेपाली नागरिकले पासपोर्टको प्रतिलिपिसमेत सँगै राख्नका लागि उक्त प्रतिलिपि प्रमाणित गरिदिन अनुरोध गर्न सक्छन् । यसका लागि अनलाइन अपोइन्टमेन्ट (https://evisaforms.state.gov/acs/default.asp?postcode=KDU&appcode=1) लिएर ५० डलर शुल्क तिरेपछि कन्सुलर अधिकारीलाई प्रतिलिपि प्रमाणित गर्नुपर्ने कागजको सक्कल पेश गर्नुपर्नेछ । कृपया नोट गर्नुहोला, नेपाली सरकारी कार्यालयमा पेश गर्नुपर्ने कागजातहरूका लागि सामान्यतया अमेरिकी दूतावासले प्रतिलिपि प्रमाणित गरिदिने छैन ।

अदालती कार्यवाहीको सूचना प्रेषण (अफिडाभिट अफ सर्विस अफ पेपर्स/नोटिस बाइ पर्सनल डेलिभरी)

सम्बन्धित व्यक्तिले कहिलेकाहीँ अमेरिकी अदालतमा जारी रहेका डिभोर्स लगायत अन्य कानुनी कार्यवाहीको सूचना प्रेषण गर्नुपर्ने हुन्छ, र यो सूचना उसको इष्टमित्र, नातेदार, वा कहिलेकाहीँ अपरिचित व्यक्तिहरूसम्म पुर्‍याउनुपर्ने हुन्छ । यसरी सूचना पुर्‍याउने काम अदालती प्रक्रियाको महत्वपूर्ण चरण हो र यो काम राम्रोसँग सम्पन्न भएको छ भनी कन्सुलर अधिकारी विश्‍वस्त हुनुपर्छ । सूचना पाउनुपर्ने व्यक्तिले सूचना पाएको हो भन्ने निर्क्यौल गर्न तपाईंसँग प्रमाण माग्न सकिनेछ ।

नाबालिगको पासपोर्टका लागि स्वीकारोक्ति

१६ वर्ष मुनिका नाबालिगले अमेरिकी पासपोर्टका लागि आवेदन दिँदा आमा र बुबामध्ये एक वा दुवै अथवा कानुनी अभिभावकहरू उपस्थित हुन नसक्ने भएमा उपस्थित हुन नसक्नेले DS-3053 स्टेटमेन्ट अफ कन्सेन्ट फारम भर्नुपर्छ र त्यसमा नोटरीको सामुन्ने हस्ताक्षर गर्नुपर्छ । उपस्थित हुन नसक्ने अभिभावक नेपालमा भए उहाँले अमेरिकी दूतावासमा यो फारम नि:शुल्क भर्न सक्नुहुनेछ, तर यसका लागि अनलाइन अपोइन्टमेन्ट लिनुपर्ने हुन्छ : https://evisaforms.state.gov/acs/default.asp?postcode=KDU&appcode=1 । नाबालिगको पासपोर्ट आवेदन फारम DS-11 सँगै नोटरी गरिएको DS-3053 फारम बुझाउनु पर्नेछ ।

सामान्य कानुनी कागजातहरू

चिठीपत्र, वित्तीय कागजपत्र, पावर अफ एटर्नीको कागजात, रियल स्टेट कारोबारलगायत अन्य विभिन्न कागजातहरू अमेरिकी दूतावासमा नोटरी गराउन सकिन्छ । हस्ताक्षर गर्नुपर्ने कागजातहरू पढेर राम्रोसँग बुझ्नुहोला । सबै कागजातहरू राम्रोसँग व्यवस्थित गरेर हस्ताक्षर गर्न तयारी अवस्थामा ल्याउनुहोला । सम्बन्धित कानुनी प्रक्रियाका अन्तिम प्रयोगकर्ताको निर्देशन पनि समावेश गर्नुहोला । दूतावासले कानुनी सल्लाहका कागजात दिन वा तिनको तयारी गर्न सहयोग गर्न सक्दैन । कुनै कागजातका लागि साक्षीको आवश्यकता पर्छ भने लिई आउनुहोला । साक्षीले फोटो भएको परिचयपत्र लिई आउनुपर्नेछ ।

विदेशमा जारी भई अमेरिकामा पेश गर्नुपर्ने कागजातको प्रमाणीकरण

अमेरिकामा सरकारी प्रयोजनका लागि पेश गर्नुपर्ने विदेशी (नेपाल) सरकारद्वारा जारी कागजातलाई पूर्ण प्रमाणीकरण गर्नुपरेमा लामो प्रक्रिया पार गर्नुपर्नेछ । सामान्यतया, पहिलो चरणमा उक्त सक्कल कागजात जारी गर्ने निकायमा सम्पर्क गरिनेछ । त्यहाँबाट उक्त दस्तावेज आधिकारिक भएको प्रमाणित गरिनेछ वा त्यसका लागि आवश्यक प्रक्रियाको ’boutमा जानकारी लिइनेछ । दोस्रो, यसरी प्रारम्भिक रूपमा प्रमाणित भएको दस्तावेजको थप पुष्टिका लागि नेपालको परराष्ट्र मन्त्रालयको कन्सुलर शाखामा सम्पर्क गरिनेछ । अन्तमा, दूतावासले मन्त्रालयको प्रमाणीकरणको पुष्टि गर्नेछ ।

अमेरिकामा जारी भई नेपालमा पेश गर्नुपर्ने कागजातको प्रमाणीकरण

अमेरिकी सरकारद्वारा जारी कागजात नेपालमा कार्यालय प्रयोजनका लागि आवश्यक पर्ने भएमा दूतावासले त्यसको प्रमाणीकरण आफैंले गर्न सक्दैन । कागजातलाई पूर्ण प्रमाणीकरण गर्नुपरेमा त्यसका लागि लामो प्रक्रिया पार गर्नुपर्नेछ । सामान्यतया, पहिलो चरणमा उक्त सक्कल कागजात जारी गर्ने निकायमा सम्पर्क गरिनेछ, जसले उक्त दस्तावेज आधिकारिक भएको प्रमाणित गर्नेछ वा त्यसका लागि आवश्यक प्रक्रियाको ’boutमा जानकारी दिनेछ । त्यसपछि सम्बन्धित राज्यको अधिकारीले स्थानीय अधिकारीले गरेको हस्ताक्षरको आधिकारिकता पुष्टि गर्छ । त्यसपछि विदेश मन्त्रालयको प्रमाणीकरण विभागको अधिकारीले राज्यस्तरीय प्रमाणीकरणको पुष्टि गर्छ । त्यसपछि वाशिङ्गटन डीसीको नेपाली दूतावासले अमेरिकी विदेश मन्त्रालयको हस्ताक्षरको पुष्टि गर्छ । अन्तिममा, दूतावासद्वारा गरिएको प्रमाणीकरणलाई नेपालको परराष्ट्र मन्त्रालयबाट थप पुष्टि गराउनुपर्ने हुनसक्छ । स्मरणीय छ, नेपाल हेग अपोस्टिल कन्भेन्सनको सदस्यराष्ट्र होइन ।

शैक्षिक प्रमाणपत्रहरूको प्रमाणीकरण

कन्सुलर अधिकारीहरूले अमेरिकामा पेश गर्नका लागि विदेशमा जारी भएका शैक्षिक प्रमाणपत्रहरूको प्रतिलिपी प्रमाणीकरण गर्न सक्दैनन् । त्यसैगरी, उनीहरूले विदेशमा पेश गर्नका लागि अमेरिकामा जारी भएका शैक्षिक प्रमाणपत्रहरूको प्रतिलिपी पनि प्रमाणीकरण गर्न सक्दैनन् । यससम्बन्धमा विस्तृत जानकारी र निर्देशन विदेश मन्त्रालयको वेबसाइटमा उपलब्ध छ : https://travel.state.gov/content/travel/en/legal/travel-legal-considerations/authentication-of-american-academic-credentials.html

दूतावासले दिन नसक्ने नोटरी सेवा

दूतावासले महत्वपूर्ण व्यक्तिगत सूचना (भाइटल रेकर्ड्स) दिने, नो अब्जेक्सन लेटर बनाइदिने, कागजातमा अपोस्टिल दिने, अनुवादको प्रमाणीकरण गर्ने, मेण्डालियन सिग्नेचर ग्यारेन्टी गर्ने, र आपराधिक पृष्ठभूमिको जाँच गर्ने जस्ता काम गर्दैन । नोटरी सेवासम्बन्धमा कुनै जिज्ञासा भएमा consktm@state.gov मा ईमेल गर्नुहोला ।