अमेरिकी दूतावासद्वारा युवालाई विपद् पूर्वतयारीसम्बन्धी शिक्षा प्रदान

२०७६ कात्तिक २९

अमेरिकी दूतावासले हालै आफ्नो सिभिल मिलिटरी सपोर्ट एलिमेन्टका तीन सदस्यलाई विराटनगरस्थित आदर्श माध्यमिक विद्यालयमा नेपाली युवालाई विपद् व्यवस्थापनको विषयमा शिक्षण गर्न पठाएको छ । विराटनगरको अमेरिकन कर्नरसँग सहकार्य गर्दै दूतावासका प्रतिनिधिले १०० भन्दा बढी विद्यार्थीलाई भेटेका छन् । उनीहरूले प्राकृतिक, प्राविधिक र मानवसिर्जित विपद्‌का लागि सक्रिय योजनाको महत्त्वको विषयमा छलफल गर्नुका साथै विद्यार्थीहरूले आफू र आफ्ना परिवारलाई तयारी अवस्थामा राख्‍नका लागि के गर्न सक्छन् भन्ने कुरा सिकाए । विद्यार्थी र दूतावासका प्रतिनिधिले सुरक्षा सामग्री कसरी तयार पार्ने, विपद् आउनासाथ के गर्ने, पट्टी र गज कसरी बाँध्ने आदि विषयमा छलफल गरे । छलफलबाट विद्यार्थीहरूले पाएको शिक्षाले उनीहरूलाई आफ्ना परिवारका सदस्य र छिमेकीलाई विपद्‌पछि उपचारको अझै राम्रो सुविधासम्म पुर्‍याउनसक्ने गरी सक्षम बनाएको छ ।

विद्यालयका प्रधानाध्यापक तुलसीप्रसाद दुलालले भन्नुभयो, “तपाईँले यी कलिला विद्यार्थीहरूलाई विपद् पूर्वतयारीको विषयमा पढाउनुभयो । हामीले आफूलाई सम्मानित महसुस गरेका छौँ । अन्य कुनै राष्ट्र हामीसँग यस विषयमा कुरा गर्न आएको थिएन । विद्यार्थीहरूले शिक्षकशिक्षिकाबाट सिकिसकेको ज्ञानलाई अझै मजबुत बनाउनका लागि उनीहरूलाई यस विषयको व्यावहारिक अनुभव चाहिन्छ ।” आदर्श माध्यमिक विद्यालयका विद्यार्थीहरूसँगको अनुभव साटासाटबाट नेपाली विद्यार्थी र अमेरिकी नागरिकले एकार्काको संस्कृति ’bout जान्ने र सँगसँगै अङ्ग्रेजी भाषा अभ्यास गर्ने अवसर पाए ।

###